Европын хамгийн том спорт хувцас үйлдвэрлэгч, дэлхийн хэмжээнд спорт хувцас хэрэглэл үйлдвэрлэлээр хоёрт бичигддэг, Америкийн Nike брэндийн хамгийн том өрсөлдөгч Германы Adidas брэндийн төв байр Германы Бавари мужид орших Herzogenaurach хотод байрладаг байсан бөгөөд саяхан Берлиний Kinzo хэмээх студийн хамт олны хийж гүйцэтгэсэн дотоод засал бүхий шинэ байрандаа нүүн орсон байна. Adidas компаний шинэ оффисын байрны дотор заслыг хийсэн Kinzo студи нь 2004 оноос хойш барилга байгууламж, дотоод засал түүнчлэн тавилга хэрэгсэл, бүтээгдэхүүний дизайны тал дээр ажиллаж байгаа студи юм.

Kinzo-гийн дизайнерууд өөрсдийн төслийнхөө талаар доорх тайлбарыг хийсэн байна. Үүнд, "Маш өвөрмөц, спортлог загвар бүхий барилгын дотор орших шилэн хонгилууд нь яг л спорт гутлын үдээс шиг орооцолдсон загвартай хийгдсэн бол захиалгаар хийж гүйцэтгэсэн тавилга сэлт нь 'цэвэр adidas'ын хэв шинжийг хадгалсан. Мөн төв хэсэгт олон талын зориулалтаар ашиглаж болох өрөөг шийдэж өгсөн. Мөн торлосон хавтангуудаар хийсэн хаалтнууд нь орон зай дотор орон зай байгаа мэт сонин сэтгэгдлийг төрүүлэх болно. Ерөнхийдөө дотоод засал нь бүхэлдээ багаар хамтран ажиллахад гойд тохиромжтой байдлаар бүтээгдсэн" гэжээ. Дашрамд дурдахад дараах зургуудын хамгийн эхний зураг дээрх барилга бол Adidas компаний хуучин төв байрны зураг юм.